Nënkryetari i LSI, Petrit Vasili, renditi njerin pas tjetrit, problemet e mëdha me të cilat po përballen sot qytetarët, deri tek greva e urisë në të cilën ndodhen prej 16 ditësh naftëtarët e Ballshit dhe përmbytja e vendit nga shirat e një nate më parë.
Në një status në Facebook, Vasili theksoi se dita e ndëshkimit për këtë qeveri kriminale do të jetë 25 prilli, dita e përmbysjes me votë.
“Kjo është një qeveri kriminale dhe hajdute. – tha Vasili para mediave. – 60 milionë euro taksa ia fali Armo-s, nuk ia mblodhi, që do të thotë 70 e ca miliardë lekë të vjetra. Ndërsa para për të paguar punonjësit nuk ka. Kryeministri rreh gjoksin dhe krenohet që nuk i bën njeri presion! – Nuk po iu bëjnë presion, por po kërkojnë hakun e tyre. Ky që ka miliarda për t’i dhënë oligarkëve për koncesione, ky që 10-fishon çmimin e një kilometri rrugë për të rrëmbyer para, ky që pretendon se po bën “Rilindjen urbane” – po vdes qytetarët. Çdo qytetar e kupton se çfarë hajdutërie ka qenë. U ngjeshën me beton pa fund dhe qytetet përmbyten. Sot është e qartë se përballë ka një qeveri të inkriminuar deri në palcë, që nuk pyet për naftëtarët. Ndaj duhet të gjithë në këmbë të vlerësojmë çdo moment. Të krijojmë bazën për një ndëshkueshmeri shembullore për këtë kërdisje që i është bërë shtetit. 25 prilli do të jetë dita e ndëshkimit, shpagimit dhe çuarjes para drejtësisë të racës më të keqe. Nuk ka më kohë për të falur asnjë nga këta maskarenj të pushtetit”, u shpreh Vasili.
