Erion Veliaj nuk humb asnjë rast për t’i shtuar edhe disa foto gënjështrës së tij të madhe të gjelbërimit të Tiranës, ndërkohë që qyteti ndodhet në vdekje klinike prej ritmit të lartë të betonizimit nga oligarkët pranë tij.
Madje, kryebashkiaku i kryeqytetit të pavarur shqiptar nuk e ka problem të kthehet në një “vali” të Sulltanit të Stambollit duke e përfshirë vendin në konfliktet e brendshme të Turqisë. Një ditë më parë, “valiu” i Tiranës publikoi fotot e mbjelljes së 251 fidanëve në zonën e Astirit në Tiranë, bashkë me mëkëmbësin e Sulltanit të Stambollit, në kujtim të viktimave të ngjarjeve të 15 korrikut 2016 në Turqi.
Ndërkohë që e gjithë bota perëndimore mohon që të ketë patur një grusht shteti në Turqi duke theksuar se ka të dhëna të forta për një skenar, Veliaj thotë në prani të ambasadorit turk se “15 korriku 2016 është një ditë feste për demokracinë”.
Por, ndërkohë që Veliaj bën propagandën e tij të përditshme duke mos marrë parasysh se po i bën kryeqytetasit palë të një konflikti që nuk na intereson, versioni shqip i TRT-së turke flet për një “festim të përbashkët të ditës së 15 Korrikut në Tiranë”.
Shqipëria është shumë larg Turqisë, fizikisht por edhe më tepër, kulturalisht kështu që “valinjtë” e Sulltanit duhet të kuptojnë se orientimi ynë është Perëndimi dhe jo Anadolli duke mos na bërë pjesë të problematikave të brendshme të këtij shteti. /27.al
