Vaksina e Covid-19, e kompanisë farmaceutike amerikane, Moderna është gati për të dalë në treg dhe shumë pyetje janë ngritur rreth saj.
Një ndër ta është edhe çmimi se sa do të kushtojë kjo dozë. Diçka e cila është zbuluar nga Shefi ekzekutiv i kompanisë, Stephane Bancel.
Në një intervistë për të përjavshmen gjermane “Welt am Sonntag”, ai ka zbuluar se vaksina do të kushtojë midis 21 dhe 33 eurove për dozë, në varësi të sasisë së porositur nga qeveritë botërore.
“Vaksina jonë kushton afërsisht e njëjtë me vaksinën e gripit, e cila kushton midis 8 dhe 40 euro. Asgjë nuk është nënshkruar ende, por ne jemi afër një marrëveshje me Komisionin e BE-së. Ne duam të dorëzojmë vaksinat në Evropë dhe jemi në negociata konstruktive”, tha Bancel, duke deklaruar se është çështje ditësh kur marrëveshja do të nënshkruhet.
Mediat e huaja kanë raportuar më parë se Komisioni Evropian dëshiron të arrijë një marrëveshje me Modernan për të blerë miliona doza me një çmim më të ulët se 21 euro.
Kompania amerikane ka njoftuar se efektiviteti i vaksinës është 94.5%. Ndërkohë doza të konsiderueshme të vaksinave anti-Covid pritet të mbërrijnë edhe në vendin tonë.
