Ka than' i moçmi: 

“Shqiptari e ka zakon që kundështon para se të marrë vesh".

                          -Faik Konica

Vajza që i vranë nënën: Fshini videon për ca like të fëlliqura! Uroj që ti mos të bëhesh kurrë Ana!

Nga 27.al 0

Një grua u vra para dy ditësh në Durrës nga i shoqi i saj, në një dyqan. Vajza e saj, e cila u shfaq në një video, që qarkullon në media dhe paqyron çastin, kur vajza shkoi në vendngjarje, ka një mesazh për të gjithë ne.
Ka një mesazh për mua, për ty, për ne, për ju dhe për ata. (Shënimi hyrës nga Elona Caslli)
………………………………………………………………………
Unë jam vajza e videos së famshme. Unë jam Ana. Vajza e vogël e Dijes. Unë jam ajo që ulërija e vajtoja shpirtin e shpirtit tim, nënën time fatkeqe, nënën time, të mjerë. Nënën, që kaloi gjithë jetën në vuajtje, për të na rritur ne.
Po e bëj këtë postim për ju portale të famshme dhe për ju njerëz, që villni vrer e përfitoni në hallin, që më ka zënë mua sonte.
Në atë hall, që une do mbaj gjithe jetën mbi supe. Ju, sigurisht pas dy tre ditësh nuk do e kujtoni më emrin tim apo të nenës sime.
Me shumë mundësi pas një muaji, do keni harruar dhe ngjarjen.
Po ju shkruaj që t’ju bëj një thirrje të gjithëve. Fshini videon time, mos u merrni më me mua! Mjaft e keqpërdorët për disa “like” të fëlliqura apo komente.
Unë jam ajo, që trokiti
– dyer të afërmish, që bënin sikur s’ma dinin hallin;
-dyer doktorash, që më percollën duke më thënë, qe s’kam pse shqetësohem,
-dyer policash, që nuk e gjykuan si shumë të rëndësishëm rastin e mamasë sime.
Po mami im, Dija ime, ishte nje grua e zakonshme me një fuqi të jashtëzakonshme, që duroi 30 vjet në një martesë. Punoi me ndershmëri për të rritur e shkolluar tri vajza.
Dija mund të ishte motra jote, mamaja jote, vajza jote.
Dija mund të jetë të gjitha bashkë, e ti nuk e di akoma.
Ti mund ta kesh Dijen në shtëpinë ngjitur dhe bën sikur nuk e dëgjon, se nuk është puna jote.
Dhe sot ti poston për Dijen, komenton për Dijen, flet për Dijen.
Epo sot ajo nuk të dëgjon dot më.
Mjaft o njerëz të fëlliqur! Mjaft u morët me ne, tani që nuk jua kemi më nevojën.
Une jam Ana dhe sot varrosa Dijen. Uroj që ti mos të bëhesh kurrë Ana!
Santiljana Tasuni

Loading...

Lini një koment

Adresa juaj e Email-it nuk do të bëhet publike

Mund të përdorni HTML tags dhe atributet: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.

gjithësej