Nikolla: Fillojmë histori të re, politika larg nga zgjedhjet në universitete
Më 20 prill do të zgjidhen drejtuesit e rinj të Universiteteve Publike. Ministërja e Arsimit Lindita Nikolla e ka shpallur këtë datë gjatë një diskutimi me rektorët e universiteteve publike. “Përsëris vendosmërinë e qeverisë dhe timen personale për të filluar një histori të re, që na ndan nga historia e vjetër e prekjes së zgjedhjeve në universitete nga politika. Universitetet janë të studentëve, të profesoratit. Ne besojmë fort tek universiteti, tek liria akademike, ndaj dhe shpresojmë që në fund të kemi një proces të drejtë, sipas ligjit të arsimit të lartë. Pas një procesi të ndershëm ku vendos vota e profesorëve dhe studentëve, ne do të kemi edhe njerëzit e duhur me të cilët do të bashkëpunojmë fort për të bërë të mundur atë që është kryefjala e punës sonë, një cilësi të re në institucionet tona të arsimit të lartë”, është shprehur në takim ministërja e Arsimit, Nikolla.
Ligji i ri i Arsimit të Lartë përcakton që votat e studentëve në përzgjedhjen e rektorit, dekanit, shefit të departamentit do të llogariten në masën 10%.
