Duke shprehur shqetësimet për situatën e krijuar pas ndryshimeve kushtetuese, Unioni i Prokurorëve të Shqipërisë thotë se në asnjë rast nuk është bërë pjesë e diskutimeve politike rreth dispozitave kushtetuese që kanë të bëjnë me sistemin gjyqësor.
Unioni thekson se është dhënë kontribut individual ose kolektiv vetëm për aspektet teknike. Gjithashtu, mosmiratimi i shtatë ligjeve bazë për mirëfunksionimin e sistemit gjyqësor po sjell dhe do të sjellë vakum ligjor.
“Në një kohë kur prokurorët e Republikës së Shqipërisë janë duke hetuar dhe përfaqësuar akuzën në gjykatë për qindra e mijëra çështje penale, konstatohet një situatë e nderë e krijuar nga mosmiratimi i ligjeve organike ne zbatim te ndryshimeve kushtetuese të datës 22.07.2016.
Krijimi i Prokurorisë së Posaçme, Këshillit të Lartë të Prokurorisë, organizimi i prokurorisë të Republikës së Shqipërisë, kërkon, referuar Kushtetutës së Republikës së Shqipërisë një afat deri në tetë muaj pas miratimit të Kushtetutës. Kjo kohe e gjate , marë në konsideratë dhe faktin se asnjë ligj nga paketa e shtatë ligjeve bazë për mirëfunksionimin e sistemit gjyqësor nuk është miratuar ende apo nuk ka hyre ne fuqi, po sjell dhe do te sjellë një vakum ligjor që do të cenojë funksionimin normal të sistemit gjyqësor dhe të punës së përditshme të prokurorisë shqiptarë”, thuhet në reagim.
