Unë nuk jam krenar për ju

Nga Geri Konomi

Nuk jam krenar për ju, sepse punoj më shumë se 8 orë për t’i siguruar të ardhura familjes time dhe askush nuk më shpërblen më kot për një punë që e kam detyrë ta bëj, aq më pak kur nuk e bëj siç pritet.

Nuk jam krenar për ju, sepse paguaj taksa dhe taksat e mia pres të jenë investime në infrastrukturë, në transport, në zhvillim urban, në shëndetësi, në arsim.

Nuk jam krenar për ju, sepse ju nuk jetoni me situatën shqiptare.

Nuk jam krenar për ju, sepse ju kërkoni lavde, deheni nga suksesi dhe nuk keni bërë asgjë deri më tani për këtë shoqëri me paratë që qeveritë ju kanë akorduar.

Nuk jam krenar për ju, sepse kurrë nuk thatë:

“Jo, nuk mund t’i marr këto para, sepse populli që unë përfaqësoj ka më shumë nevojë sesa unë për to.”

Nuk jam krenar për ju, sepse ju jeni si lojtarët e blerë nga jashtë, nuk interesoheni për vendin, për të cilin luani.

Nuk jam krenar për ju, sepse pranoni festa të dyfishta dhe humbjet i quani fitore për një çelës qyteti më shumë, për një dekoratë më shumë, për një pasaportë më shumë, për miliona para të pamerituara.

Po, po, të pamerituara dhe ju jeni të vetëdijshëm. Ja pse nuk jam dot krenar për ju e dashur kombëtare e futbollit shqiptar.

Më vjen turp dhe s’jam krenar për ju!