Sulmet e përsëritura terroriste nëpër Europë kanë vënë sërish në dyshim mbarëvajtjen normale të evenimentit më të rëndësishëm të verës, kampionatit Europian që do të zhvillohet në Francë. Fillimisht sulmet me mbi 100 viktima në territorin e organizatorëve të aktivitet dhe tashmë një skenar i ngjashëm në vendin fqinjë, Belgjikën, bën që të përsëritet hipoteza për zhvillimin e Euro 2016 me dyer të mbyllura. Por nëpërmjet një deklarate të fundit për agjensinë “ANSA”, UEFA ka deklaruar zyrtarisht se nuk janë marrë në konsideratë ndryshime në organizim, qoftë edhe për t’iu mos nënshtruar terrorit. “Jemi totalisht të bindur, që me masat e nevojshme të sigurisë që do të ndërmerren do të garantohet një kampionat i sigurtë, festiv dhe nuk parashikohen ndeshje me dyer të mbyllura”. Kjo është edhe një përgjigje pas deklaratës së djeshme të zv/presidentit të futbollit europian, Xhankarlo Abete, i cili hodhi hipotezën për zhvillimin e ndeshjeve pa praninë e publikut. “Të gjithë jemi duke punuar për të përballuar situata krize në kushte urgjence, me qëllimin për të garantuar sigurinë e pjesmarrësve, duke përfshirë futbollitët, tifozët dhe gjithë të tjerët që do të jenë prezentë në këtë eveniment”, përfundon komunikata e UEFA-s.
