Nga ndryshimet në ligjin për programet sociale, njoftohet se do tu njihet pronësia për pronat e tyre 400 familjeve të shpronësuara në vitin 1994 nga ndërtimi i Ujësjellësit Bovillës.
Ndërkohë, Ministrja e Zhvillimit Urban, Eglantina Gjermeni, tha se ligji ka mangësi në trajtimin e çështjeve të tilla, ndaj sipas saj Qeveria po punon për një ligj të ri për programin e strehimit.
Gjermeni: Ndryshimet e propozuara në këtë ligj për programet sociale të strehimit jo vetëm që nuk sjellin asnjë kosto shtesë për buxhetin e shtetit, por i japin zgjidhje përfundimtare shqetësimit të parashtruar nga përfaqësuesit e 400 familjeve të shpërngulura nga ndërtimi i Ujësjellësit të Bovillës, çështja e të cilëve duhet të ishte zgjidhur kohë më parë.
Deputetët demokratë në Komision ngritën shqetësimin e prishjes së ndërtimeve në gjithë vendin, për shkak të projekteve infrastrukturore, duke theksuar se Qeveria nuk po i dëmshpërblen qytetarët.
Por Ministrja Gjermeni tha se e gjithë proçedura e dëmshpërblimeve bashkë me çmimet përkatëse bazohet në vendimet e Këshillit të Ministrave.
“Këto bovilla të klonuara do të kenë një kosto sociale për të cilën do merren, dua një përgjigje për këtë problem të krijuar”.
Gjermeni: Sa i përket çmimit të shpronësimeve bazohet në vendim të KM dhe është i njëjtë në varësi të truallit ku gjendet, si për truallin ashtu dhe për banesat apo godinat është i njëjtë në Vlorë, në Korçë apo diku tjetër, bazohet në një vendim të KM.
Në Komision Ministrja Gjermeni shoqërohej nga Drejtori i ALUIZNI-t, Artan Lame, të cilët siguruan se brenda mandatit qeverisës proçesi i legalizimeve do të ketë përfunduar pothuajse në gjithë zonat informale.
