Të paktën 17 persona mes të cilëve 8 ushtarë humbën jetën dhe 27 të tjerë kanë mbetur të plagosur në juglindje të Turqisë, si pasojë e një sulmi me autobombë.
Të plagosurit janë dërguar menjëherë spital për të marrë trajtimin e nevojshëm shëndetësor. Mjekët janë shprehur se disa prej tyre kanë marrë plagë të rënda, duke mos përjashtuar mundësinë e rritjes së bilancit të viktimave.
Burime zyrtare bëjnë me dije se sasia e lëndës eksplozive ishte e montuar në një makinë dhe u aktivizua nëpërmjet një detonatori.
Dyshohet se sulmi në bazën ushtarake “Durak” në rajonin Semdinli të provincës Hakkari, është vepër e Partisë së Punëtorëve të Kurdistanit (PKK). Militantët e PKK-së e kanë hedhur në erë automjetin me eksploziv gjatë një kontrolli rutinë mëngjesin e së dielës.
Shkak për këtë sulm dyshohen aksionet, që forcat turke të sigurisë kanë ndërmarrë kundër anëtarëve të Partisë së Punëtorëve të Kurdistanit, e cila është nxjerrë jashtë ligji në këtë provincë.
