Pas vendimit të opozitës së bashkuar për të dërguar përfaqësues në tryezën për Reformën Zgjedhore, ku e pranishme është edhe OSBE, ka reaguar Ambasada e SHBA.
Përmes një statusi në Facebook, Ambasada e SHBA në Tiranë ka vlerësuar vendimin e opozitës për t’u bërë pjesë e kësaj tryeze, me këtë vendim kreu i opozitës, Lulzim Basha, demonstroi udhëheqësi të vërtetë.
“Shtetet e Bashkuara mirëpresin vendimin e partive opozitare për të dërguar përfaqësues në konferencën për reformën zgjedhore bashkërenduar nga parlamenti dhe Prezenca e OSBE-së në Shqipëri. Ne përshëndesim Kryetarin e Partisë Demokratike Lulzim Basha që thirri një takim të opozitës dje. Përpjekjet e tij demonstrojnë udhëheqësi të vërtetë mbi një çështje thelbësore për forcimin e mëtejshëm të institucioneve demokratike të Shqipërisë. Shtetet e Bashkuara mbështesin miratimin e reformave të nxitura nga ekspertët zgjedhorë të OSBE/ODIHR në mënyrë që Shqipëria të mund të zhvillojë zgjedhje që janë të lira nga shtrëngimi, trysnia politike, dhe blerja e votes. Populli shqiptar nuk meriton asgjë më pak se sa kjo”, thuhet në reagimin e SHBA.
