“Qeveria e Kosovës dhe e Shqipërisë e kanë sfidë të përbashkët mbrojtjen e tokave shqiptare.”
Deputetja e PDIU-së, Mesila Doda, i ka bërë thirrje Presidentit Nishani të mbledhë Këshillin e Sigurisë, nëse është i vërtetë lajmi që në kufi me Kosovën ka prani të trupave serbe. Deputetja e Kuvendit të Shqipërisë, i referohet lajmeve të pasqyruara në media sipas të cilave, këto 48 orët e fundit mbi dy mijë forca serbe kanë zbarkuar në brezin kufitar me një makineri të rëndë luftarake. Burime të agjencisë se lajmeve “Presheva Jonë” në terren kanë mësuar se kufiri Serbi – Kosovë prej 117 km nga Karadaku i Preshevës (Muçibabë) deri në Medvegjë (Mutivodë), pothuajse është blinduar nga forca të mëdha serbe. Referuar këtij informacioni që vjen nga mediat, zonja Doda ka kërkuar nga krerët e shtetit shqiptarë dhe ata të Kosovës, të bashkëpunojnë për të ndalur pushtuesin serb. Ajo thekson se është sfidë e përbashkët e Kosovës dhe Shqipërisë ndalja e pushtuesit serb.
“Nëse ky lajm është i vërtetë, Presidenti duhet të mbledhë menjëherë Këshillin e Sigurisë. Ne duhet të sillemi si një Komb, të lëmë mënjanë sherrnajat dhe të bllokojmë çdo përparim të pushtuesve serbë në tokat shqiptare. Qeveria e Kosovës dhe e Shqipërisë e kanë sfidë të përbashkët mbrojtjen e tokave shqiptare”, shkruan Doda.
