Nga Klodian Tomorri
Tranzicioni tremujor i formimit të qeverisë është një kosto e panevojshme për vendin dhe ekonominë. Ligji që e përcakton këtë është një akt totalisht idiot, i cili duhet ndryshuar një orë e më parë.
Nuk ka asnjë arsye se pse duhet të ketë tre muaj vakuum pushteti. Kjo është e dëmshme. Në Shqipëri administrata shthuret nga nisja e fushatës zgjedhore deri në formimin e qeverisë së re. Qytetarët nuk shërbehen, biznesi dekurajohet të ndërmarrë investime të reja.
Me tej akoma, kryeministri nxjerr vendim ku pezullon të gjitha tenderat publikë. Buxheti trajtohet si një derë, që mund ta hapësh dhe mbyllësh sa herë të duash.
Fushata fillon në prill, qeveria e re formohet në shtator. Janë plot 6 muaj ose gjysma e vitit, që kufizohen shpenzimet buxhetore duke cënuar në mënyrë dramatike efektivitetin e tyre.
Nga ana tjeter, ekonomisë i krijohet një pasiguri tërësisht e panevojshme, e cila u manifestua qartë një ditë më parë tek treguesit e besimit. Rezultati i kësaj është prodhim i munguar, rritje më e ngadaltë mirëqenieje për qytetarët.
Shqipëria nuk e ka luksin të paguajë kosto të panevojshme. Ligji fare mirë mund të ndryshohet. Dy javë janë mëse të mjaftueshme për të numëruar votat, përfunduar çdo ankimim dhe mbledhur Parlamentin e ri.
