Të gjithë ata që vuajnë nga sëmundjet e brendshme tani do të kenë mundësi të marrin trajtimin e duhur edhe në Spitalin Universitar “Shefqet Ndroqi” në Tiranë.
Investimet prej 442 milionë lekëve vetëm për senatoriumin kanë krijuar kushte më të mira jo vetëm infrastrukturore, por edhe në laborator për ndërhyrje kirurgjikale.
Kryeministri Edi Rama, i shoqëruar nga Ministri i Shëndetësisë Ilir Beqaj, vizituan sot disa nga pavijonet e reja të sëmundjeve të ndryshme.
Për Kryeministrin ky spital është shëmbëlltyra e vizionit të qeverisë për një sistem shëndetësor publik europian dhe konkurrues me atë privat.
Rama: “E bëjmë me shumë kënaqësi këtë fotografi familjare me një ekip vërtet mbresëlënës, që ka arritur në një periudhë kohe relativisht të shkurtër të përmbysë një histori të hidhur shumëvjeçare rrënimi të këtij spitali kaq të rëndësishëm dhe jo vetëm kaq, por dhe ta transformojë këtë spital në një shtëpi mikpritëse, me infrastrukturë bashkëkohore dhe më një shërbim të kualifikuar e të përkushtuar ndaj të gjithë atyre që vijnë këtu për t’u vizituar. Nuk është më sanatoriumi i dikurshëm, por është një spital rajonal që është pasqyra e ambicies sonë për një shëndetësi të rilindur, për një shërbim publik shëndetësor që nuk i lë asgjë mangët punës e që konkurron denjësisht me çdo spital privat në Tiranë.”
Ndërsa Ministri Beqaj tha se ky investim jo vetëm ka lehtësuar fluksin e pacientëve që i drejtohen QSUT-së, por edhe ka shkurtuar kohën e shërbimit dhe shpenzimet, veçanërisht për ata që vijnë nga qytete të tjera.
Beqaj: “Që nga shtatori vjet, ne ofrojmë këtë shërbim dhe këtu, që na ka ndihmuar shumë për të ulur radhën e pritjes. Me çfarë kemi bërë në QSUT dhe me çfarë kemi bërë dhe këtu, praktikisht, për tre vjet radha e pritjes nga 6 muaj ka ardhur në 30-35 ditë”.
Për këtë spital është në zbatim edhe faza e tretë e investimeve që përfshin investimet në qendrën e ekzaminimeve dhe infrastrukturën e godinave të administratës.
