Tragjedia e sotme në qytetin e Himarë, ku një vajzë 7-vjeçare humbi jetën pasi u përplas nga një motomjet jo vetëm tronditi opinionin publik, por “zhveshi” edhe një herë propagandën e shtetit dhe ministrave përgjegjës. Dhe këtë e vërejmë tek një postim të bërë nga ministrja e Turizmit, Mirela Kumbaro, e cila para 3 ditësh në një video në faqen e saj të facebook, propagandonte se Policia e shtetit po patrullon në të gjithë bregdetin e jugut për të ndalur mjetet lunduruese që kryejnë manovra të rrezikshme.
“Patrullimi gjatë gjithë kohës i bregdetit nga Policia e Shtetit që së fundi ka bllokuar edhe 2 mjete të tjera lundruese duke ndëshkuar pronarët e tyre të cilët kryen manovra të rrezikshme në plazhin e Ksamilit. Vetëm në korrik janë ndëshkuar 25 drejtues të mjeteve lundruese, nga të cilat 3 janë bllokuar. Me thirrjen për gjithë pushuesit që sa herë të shohin kundravajtje të tilla t’i denoncojnë” – shkruante para disa ditësh ministrja e Turizmit, Mirela Kumbaro në facebook.
Por si çdo punë e qeverisë dhe ministrive që kujdesen më shumë për imazhin dhe propagandimin e gjysmëpunëve që bëjnë, edhe kjo e ministres Kumbaro ka qenë një aktrim me disa policë sa për të bërë videon dhe ta hedhin në facebook, pasi rasti i sotëm ua shkërmoqi sërish fasadën.
Kujtojmë se qyteti i Himarës u trondit pasditen e sotme nga një ngjarje e rëndë ku humbi jetën një vajzë e mitur. Vetëm 2 kilometra larg qendrës, tek plazhi i Potamit, helikat e fuqishme të një skafi i morën jetën 7-vjeçares dhe bënë që pushuesit e pranishëm të shihnin llahtar me sy. Skafi drejtohej nga Arjan Tase, ish-shef komisariatit në policinë e Himarës. Ky i fundit ishte arrestuar dy vite më parë për shpërdorim detyre, pasi kishte lejuar kultivimin e kanabisit në Vlorë.
Gjithashtu për këtë ngjarje është paralajmëruar edhe një protestë para kryeministrisë ditën e enjte në orën 19:00, ku do të kërkohet dorëheqja e ministrit të Brendshëm, Bledi Çuçi dhe ministres së Turizmit Mirela Kumbaro.
