Prokuroria e Krimeve të Rënda ka kërkuar caktimin e masës së sigurisë arrest me burg për tetë persona nga Fieri, të dyshuar për trafikim të lëndëve narkotike, duke vepruar si një grup i strukturuar kriminal. Këta persona u arrestuan pak ditë më parë nga policia e Fierit.
Hetimet për këtë grup kanë nisur nga Prokuroria e Krimeve të Rënda që nga qershori i këtij viti, pasi një prej të arrestuarve, Meto Skënderaj dyshohet se siguronte sasi lënde narkotike, në bashkëpunim me Leo Tafa dhe Mehmet Skënderaj. Më pas ai i magazinonte ato duke i përpunuar e tharë me qëllim shitjen jashtë territorit shqiptar.
Në kontrollin që policia bëri në banesën e Mehmet Skënderaj, ne fshatin, Ninesh, Mallakastër u sekuestrua sasia prej 145 kg lëndë narkotike e dyshuar Cannabis Sattiva, dhe sasia prej 425 fara bime e dyshuar Cannabis Sattiva, që u gjet në një kuti plastike në formë të rrumbullakët, me peshë 26.70 gram.
Për këtë arsye, Prokuroria për Krime të Rënda kërkon caktimin e masës së sigurisë: “arrest me burg” për shtetasit: Leo Tafa, Meto Skenderaj dhe Mehmet Skenderaj të dyshuar si organizatorë, dhe Indrit Tafa, Drjan Tafa, Eglatin Tafa, Artan Skënderaj dhe Miklovan Tafa, të dyshuar si puntorë.
