Deputetja demokrate Jozefina Topalli tha se protesta që ka nisur opozita është një fillim i mbarë për një lëvizje që mund të çojë në një revolucion brenda forcave politike, në një përfaqësim më real brenda parlamentit, në një raport tjetër me elitën, ose në raport me kartën morale.
E ftuar në emision “Të paekspozuarit” Topalli theksoi se nuk është për të mos marrë pjesë në zgjedhje siç ishte sugjerimi i komentatorit Bushati.
“Nuk jam dakord me zotin Bushati që zgjidhja e kësaj situate mund të realizohet përmes mospjesëmarrjes në zgjedhje. Nuk e besoj për 1000 arsye që i kam thënë. Ishte një fillim i mbarë për një lëvizje që mund të çojë në një revolucion brenda forcave politike, në një përfaqësim më real brenda parlamentit, në një raport tjetër me elitën, ose në raport me kartën morale. A mund të flitet për një kartë morale brenda politikës, medias e biznesit? Politika pa moral është një degradim“, tha Topalli.
