Duket se qeveria shqiptare do të menaxhojë edhe Ansamblin Historik të Pallatit të Brigadave përmes një partneriteti të quajtur PMI (Plan Menaxhimi i Integruar). Plani i Menaxhimit të Integruar do të përbëhet nga një grup ekspertësh të fushave të ndryshme të cilët e njohin këtë monument, sipas qeverisë.
Vendimi që është publikuar në Fletoren Zyrtaret dhe theksohet se ky menaxhimi do të bëhet në partneritet me një periudhë prej 20 vitesh, ku pala e interesuar duhet të ketë financimin e duhur dhe përvojën për rijetëzimin e këtij Ansambli. Po ashtu, në vendim specifikohet se “një konsideratë duhet pasur për mbikëqyrjen e aktiviteteve nga një bord profesionistësh të fushës, që kontrollojnë dhe garantojnë që të ruhen vlerat e monumentit”.
Bordi do të ketë në përbërjen e tij specialist të menaxhimit, jurist, botanistë, historian dhe restauratorë të arkitekturës dhe do të shërbejë si një këshillues për menaxhimin. Ndërkohë, pritet që një plan i tillë të ndryshojë edhe tarifat për lejimin dhe mundësimin e zhvillimit të aktiviteteve kulturore në mjediset e brendshme dhe të jashtme.
Ansambli i ri do të ketë edhe funksion akomodues për personalitete shqiptare dhe të huaja, të cilët vijnë për vizitë në vendin tonë. Në vendim thuhet se ky menaxhim nuk do të cenojë vlerat historike dhe arkitekturore të monumentit, por do ta kthejë në një pikë tërheqëse turistike.
Përmes këtij akti, qeveria kërkon që të sigurojë një menaxhim të qëndrueshëm që të sigurojë të ardhura të vazhdueshme për ruajtjen dhe restaurimin e monumentit. Sipas vendimit, monumenti do të restaurohet, do të rijetëzohet dhe do të përcaktohet mënyra e qartë e menaxhimit të tij përmes ruajtjes dhe zhvillimit të Ansamblit. Kjo pasuri do t’i mbetet në pronësi qeverisë shqiptare dhe ministrisë së Kulturës, e cila do të jetë përgjegjëse për zbatimin e këtij plani.
