Në ceremoninë e rikonstruksionit të godinës së Ministrisë së Brendshme i pranishëm në këtë event, kryeministri Edi Rama ka deklaruar se, sot Policia e Shtetit ka një sistem logjistik të avancuar, i cili sipas tij e ngre në nivelin e duhur për të luftuar kundër krimit.
Rama ka vlerësuar punën e bërë nga ministri i Brendshëm Saimir Tahiri, ndërsa ka nënvizuar se është rritur numri i të rinjve që kërkojnë të jenë pjesë e trupës së Policisë së Shtetit.
Gjatë ceremonisë ministri Tahiri përsëriti kërkesën publike ndaj kryeministrit Rama për të parë mundësinë e rritjes së pagës së punonjësve të policisë.
Saimir Tahiri: “Të shihet me përparësi rritja e pagës për punonjësit e policisë”
Më pas erdhi dhe përgjigjja e kryeministrit: Patjetër do të vazhdojmë të rrisim dhe rrogat e policisë, por të mos xhelozohen nëse do i rrisim më shumë pagat e mësuesve këtë herë.
Kryeministri Rama i kërkoi PD-së të heqin dorë nga akuzat dhe ta lërë të qetë të bëjë detyrën e saj.
Edi Rama: PD ka gjithmonë kohë për të hequr dorë nga kjo armiqësi e shpallur ndaj policisë së shtetit. Lëreni të bëjë detyrën dhe vazhdoni merruni sa të doni me mua, me ministrin por policinë e Shtetit lëreni tu shërbejë vendit dhe njerëzve. Nëse nuk keni asnjë ide sugjerim apo mendje në kokë për të ndihmuar që puna të bëhet më e mirë minimalisht qepeni gojën sepse rezultatet e policisë së shtetit janë të dukshme dhe lufta me krimin drogën dhe trafikun dhe për sigurinë e qytetarit është sot sikur nuk ka qenë kurrë më parë edhe më e mirë do të bëhet.
