Task-Forca e Bashkisë së Tiranës dhe Ujësjellës Kanalizimeve ka ndërprerë gjatë ditës së djeshme 99 lidhje të paligjshme si dhe ka vendosur 211 matës të rinj, duke e çuar në total numrin e matësve të instaluar që nga ditët e para të nisjes së aksionit në 840.
Gjatë kontrolleve ka rezultuar se uji i pijshëm përdorej për ujitje, ndërsa kanë vendosur 11 gjoba për familjarë dhe 15 të tjera për biznese të ndryshme. Një pjesë e këtyre rasteve janë referuar në organet ligj zbatuese të Policisë së Shtetit dhe Prokurorisë.
Gjithashtu, falë masave të marra nga Bashkia e Tiranës dhe ndërmarrja e Ujësjellës-Kanalizime, të mërkurën janë lidhur 83 kontrata të reja, si dhe janë nënshkruar 45 aktmarrëveshje.
Grupet e shpërndara në terren vijuan punën për marrjen e masave për shkak të thatësirës së zgjatur dhe temperaturave të larta, duke verifikuar 1053 raste, ku në fokus të punës së tyre ishte pikërisht shkëputja e çdo lidhje të paligjshme në rrjetin e ujësjellësit, si dhe të çdo rasti tjetër të abuzimit me ujin e pijshëm.
Një vëmendje e veçantë i është kushtuar edhe eliminimit të abuzimeve me ujin e pijshëm nga subjektet private, ku janë marrë të gjitha masat për ndërprerjen e lidhjeve të ujit që përdorej nga lavazhet e makinave apo për ujitje.
Qytetarët kanë në dispozicion dy numra telefoni, 08004488 të Ujësjellësit të Tiranës dhe atë të Bashkisë së Tiranës 08000888, për të raportuar problemet e furnizimit me ujë të pijshëm, apo të denoncojnë rastet e abuzimit të cilat dëmtojnë rrjetin e ujësjellësit.
Për zonat që janë prekur nga kufizimet me ujë të pijshëm, Bashkia e Tiranës ka vendosur në dispozicion gjithë flotën e saj me bote për furnizimin e banorëve.
