Sipërmarrësi Lulzim Kazani është plagosur dhe është në spital jashtë rrezikut për jetën
Persona të armatosur kanë qëlluar me armë zjarri një biznesmen ndërtimesh në Tiranë, teksa po zbriste nga makina për të hyrë në banesën e tij. Ngjarja ka ndodhur në orët e mbrëmjes në zonën e Komunës së Parisit në kryeqytet ku biznesmeni Lulzim Kazani, rreth 65-vjeç, u sulmua me armë zjarri nga persona të paidentifikuar.
Policia njofton se ndërtuesi është qëlluar me breshëri plumbash, pasi ka dalë nga makina e tij ku ndodhej edhe bashkëshortja. Lulzim Kazani ka marrë disa plumba në trup, por është jashtë rrezikut për jetën. Biznesmeni i plagosur është dërguar menjëherë në spitalin ushtarak. Policia ka nisur hetimet për ngjarjen.
