Një rrebesh shtyn takimin e “Selman Stërmasit” për rreth 1 orë, ndërkohë që është Lorenc Jemini që i mohon një tjetër 11-metërsh bardhebluve, shumë të ngjashme me atë që nuk u vërshëllye nga Remzi Sadiku një javë më parë
Asgjë nuk shkon normalisht për Tiranën. Fillimisht ndeshja kundër Kukësit filloi gati një orë me vonesë, për shkak të një rrebeshi që e përmbyti stadiumin “Selman Stërmasi”, ndërsa në lojë i mohuan një tjetër 11-metërsh, ashtu si një javë më parë, këtë rradhë të pa vërshëllyer nga Lorenc Jemini, pas ndalimit të një topi me dorë brenda zonës kukësiane, nga ana e Pero Pejiç. Për ironi, në fillim të ndeshjesh ishte pikërisht Pejiç që fitoi një penallti dhe e ktheu në gol, duke regjistruar të tretin në këtë edicion.
Ndeshja u barazua nga Taku dhe në pjesën e dytë ishte Emini, i sapo dërguar në fushë nga trajneri Gjoka, që e kthen Kukësin në avantazh. Gjatë kësaj periudhe është folur gjatë për dy futbollistë të huaj, që Tirana i kishte afruar, por ende nuk kishin fituar të drejtën për t’u aktivizuar. Njëri prej tyre është Marville, për të cilin ia ka vlejtur këmbëngulja, pasi debutoi në mënyrën më të mirë të mundëshme, me lojë dhe një gol të shkëlqyer që evitoi humbjen e bardhebluve. Drejtuesit e Korabit, menjëherë sapo mbërritën në Kategorinë Superiore kanë ndërruar plotë 22 futbollistë, me llogjikën e thjeshtë për të qenë dinjitozë në elitën e futbollit shqiptar, por deri tani kjo nuk ka ndodhur. Dibranët janë mundur 1-0 nga Luftëtari në “Elbasan Arena”, pas një goli të sulmuesit venezuelian Montero, por kjo është edhe një humbje që djeg më shumë, pasi vjen nga kundërshtarët direkt në garën për mbijetesë dhe për më tepër, në tre javët e para të kampionatit, Korabi ende nuk ka arritur të shënojë qoftë edhe një gol. Nga ana tjetër, Skënderbeu ka arritur fitoren e tretë në po aq ndeshje të luajtura, duke mundur në shtëpi minimalisht Laçin, 1-0. Korçarët vërtetë nuk kanë shkëlqyer, por edhe nuk e kanë pasur të vështirë të menaxhojnë avantazhin pas golit të shënuar nga Serxhio Junior që në të 22’. Kjo javë do të mbyllet nesër, me ndeshjet Vllaznia – Flamurtari dhe Teuta – Partizani.
Kategoria Superiore/ Java III
Sot
Luftëtari – Korabi 1-0
Skënderbeu – Laçi 1-0
Tirana – Kukësi 2-2
Nesër
Vllaznia – Flamurtari (13:00)
Teuta – Partizani (16:00)
