Tirana është përzgjedhur nga Forumi Botëror i Urbanistikës, si një nga 3 qytetet që ka pësuar më shumë ndryshime vitin e fundit.
Kreu i Bashkisë së Tiranës, Erion Veliaj, zhvilloi një vizitë dy ditore në Kuala Lumpur të Malajzisë, si i ftuar në Forumin Botëror të Urbanistikës për të prezantuar arritjet dhe ndryshimet e mëdha që ka pësuar kryeqyteti shqiptar vitin e fundit.
Në fjalën e mbajtur në forumin Veliaj prezantoi projektet transformuese të Tiranës dhe vizionin për të ardhmen.
Veliaj deklaroi se falë energjisë së përbashkët dhe bashkëpunimit mes qeverisë qendrore dhe asaj lokale, ndryshimet e realizuara në një kohë kaq të shkurtër janë të mrekullueshme.
Kryebashkiaku vlerësoi se Forumi Botëror i Urbanistikës ishte një mundësi e vyer për të folur për mënyrën se si në Tiranë janë realizuar në një kohë të shkurtër projekte të mëdha, edhe me përfshirjen e biznesit dhe aktorëve të ndryshëm.
