Një supergol në minutën e 90 i Hoxhallarit, i ka dhënë Tiranës Superkupën e Shqipërisë pas duelit përballë Kukësit, të luajtur në “Selman Stërmasi”.
Gjuajtja nga jashtë zonës e mbrojtësit të majtë theu Enea Koliçin, i cili kishte dhuruar deri atëherë pritje pas pritjeje, në një ndeshje të dominuar nga bardheblutë.
Një karton i kuq i shpejtë i Shametit komplikoi planin e Milinkoviç, ndërsa skuadra e tij, me një lojtar më pak, nuk arriti të prodhonte lojë. Nga ana tjetër, Tirana krijoi e shpërdoroi shumë para portës, edhe falë mrekullive të Koliçit.
Por goditja e Hoxhallarit në ekstremin e ndeshjes vendosi takimin, duke i dhënë skuadrës së Ze Marias një trofe të rëndësishëm për prestigjin, në një sezon ku duhet të provojë udhëtimin dhe vështirësitë e Kategroisë së Parë.
