Lideri i LSDM-së, Zoran Zaev ka prezantuar programin qeveritar, duke thënë se Maqedonia do të jetë shtet për të gjithë dhe që synon integrimet euro-atlantike.
Në një konferencë për shtyp, mbrëmjen e djeshme duke folur rreth Ligjit për gjuhët, Zaev tha se do të mbështesin politikë gjuhësore që i mundëson bashkësisë etnike shqiptare të komunikojnë në gjuhën e tyre.
“Do të mbështesim ndryshime ligjore në pajtim me amendamentin 5 të Kushtetutës, që t’i mundësojmë bashkësisë etnike shqiptare që të komunikojnë në gjuhën e tyre amtare me të gjitha institucionet shtetërore. Do të ketë ndëshkime për të gjitha institucionet që nuk do të respektojnë këto vendime”,- shprehet Zaev.
Kreu i LSDM-së i ka cilësuar veprimet e presidentit George Ivanov dhe kreut të VMRO-DPMNE si lojë të rrezikshme.
Pas deklaratës së Zaev kanë qenë të menjëhershme edhe reagimet nga partia e Nikolla Gruevskit.
Zyrtari i partisë së Gruevskit, Antonio Milloshovski nga VMRO-DPMN ka mbajtur konferencë për shtyp gjatë të cilës i kërkoi Zaevit të heqë dorë nga ajo që ata e cilësojnë si platforma e sjellë nga Tirana.
“Zaev u ngatërruar me paralajmërimet për debate për simbolet shtetërore. Nëse duan që ta ruajnë unitaritetin e shtetit, atëherë t’i tregojë edhe opinionit se e hedhin poshtë platformën e Tiranës. Ai edhe njëherë konfirmoi se është i shantazhuar dhe me mashtrim të interesave shtetërore do që ta vjedh pushtetin. Deri dje Zaev ka gënjyer se me BDI-në dhe Selën kanë biseduar vetëm për parimet kryesore, por nuk e ka zbuluar përmbajten e saj”, shprehet Milloshovski.
