Presidenti i Kosovës, Hashim Thaçi, ka zhvilluar një bashkëbisedim në “Council on Foreign Relations” në Washington DC, ku para një audience të specialistëve të rajonit ka folur për përpjekjet dhe për arritjen e një marrëveshjeje të paqes në mes të Kosovës dhe Serbisë.
Kreu i shtetit theksoi se qëllim kryesor i marrëveshjes është njohja e Kosovës nga Serbia dhe anëtarësimi i Kosovës në Kombet e Bashkuara.
“Nuk do të jetë proces i lehtë arritja e marrëveshjes në mes të Kosovës dhe Serbisë, por është e vetmja rrugë përpara për të evituar kthimin prapa në tensione dhe konflikte. Sa herë Kosova ka qenë bashkë me Shtetet e Bashkuara, ka dal fitimtare. Edhe nëse kompromiset e bëra janë dukur të rënda në fillim, më vonë është treguar se kanë qenë vendimet më të mira strategjike. Një nga pikat do të jetë edhe demarkimi i kufirit në mes të Kosovës dhe Serbisë, kjo është mundësi për të korrigjuar kufirin edhe në veri të Kosovës, edhe në jug të Serbise. Nëse një korrigjim i lehtë i kufirit është çmimi për marrëveshje përfundimtare të paqes, atëherë kjo do të duhet të jetë e pranueshme”, u shpreh Thaçi.
