Në seancën e sotme plenare kryeministri Edi Rama akuzoi opozitën se ishin ata që në vitin 2011 e votuan raportin e Dick Martyt në Asamblenë Parlamentare të Këshillit të Evropës. Rama tha se prej këtij raporti, u krijua Gjykata speciale e Kosovës, që çoi padrejtësisht në burg komandantët e UÇK, që është një prej krenarive më të madhe të shqiptarëve.
Nga foltorja e Kuvendit, Rama sulmoi sërish opozitën teksa tha se është unikale në historinë e botës që një president në detyrë të merret peng pa akuzë.
“Sot fakti është se asnjë nga misionet dhe hetimet, nuk janë vërtetuar asnjë nga akuzat nga zotëria në fjalë. Këtu është momenti për ta thënë shumë qartë se kjo nismë që ne do ta çojmë deri në Strasburg nuk ka asnjë synim për të interferuar me procesin e drejtësisë që po zhvillohet në Hagë. Në gusht të 2015, Thaçi bashkë me të tjerët në anën e akuzuar asokohe në parlament miratuan krijimin e dhomave të specilizuara për ndjekje penale për ato pretendime. Ato ishin objekt hetimi me kohë e me vakt, por fatkeqësisht për Kosovën dhe ushtrinë, për Shqipërinë dhe për shqiptarët që kanë atdhe e për turpin e atyre që votuan atë raporton në KE, balta mbuloi dynjanë ndërkohë që asnjë provë nuk u gjet. Në asnjë prej hetimeve dhe aktakuzave që u ngritën ndaj udhëheqësve të UÇK nuk përbën asnjë rast që lidhet me trafikun e organeve njerëzore. Flasim për akuzat e raportit që i dha jetë dhomave të specializuara. Shqipëria ka detyrë të veprojë sot pasi kemi aktakuzën pasi lexojmë se për çfarë akuzohet Thaçi. Është unikale në historinë e botës që një president në detyre të merret peng pa akuzë, të rrijë 1 vit pa akuzë”, tha Rama.
