Një nga fshatrat më të dëmtuara në Tiranë nga tërmeti 6.4 ballë i 26 nëntorit është ai i Pezës.
Një nga familjet e cila po kalon natën në çadër është familja Zgura e cila përbëhet nga 5 anëtarë, Pranvera, bashkëshorti i saj dhe 3 fëmijët.
Pranvera, nëna e tre fëmijëve rrëfen tmerrin që përjetuan natën që ra tërmeti dhe netët pa gjumë dhe të rënda që po kalojnë në çadër që pas 26 nëntorit.
“Çadra poshtë është ujë. Vajza qëkur jemi futur në çadër, kollitet jashtë mase. Është shumë katastrofë, kur më shkon mendja, mendoj për fëmijët… shumë e stresuar”, thotë Pranvera.
Frika për të ardhmen i shtrëngon zemrën, por as të tashmes s’i beson. Njerëzit e afërm i ofrohen për ta strehuar, por ajo nuk do t’i shqetësojë pasi sipas Pranverës nuk është një apo dy netë, është një jetë përpara.
“Vetëm një motër kam. Ajo më ndihmon shumë. Më lutet çdo ditë, çdo natë, hajde! I vjen shumë keq për mua, për fëmijët. Edhe kunati këtu që kam afër më ka thënë, shumë herë”.
Ardit Gjebrea jep në studio edhe lajmin e mirë për këtë familje. Sulejman Çela nga New York ka vendosur të kontribuojë me një shumë prej 10 mijë dollarësh, për ti ndërtuar shtëpinë.
Vajza e tyre 13- vjeçare, së bashku me një shoqe kanë ngritur një llogari për çeljen e disa fondeve dhe deri tani janë grumbulluar rreth 9 mijë dollarë, por ata do ti bëjnë 10 mijë dollarë.
