Gjykata e Apelit në Tiranë ka shpallur të pafajshëm Ergys Kolaverin, personin që akuzohej se do të kryente një atentat brenda burgut të Vaqarrit. Në nëntor të vitit 2017, Kolaveri u dënua asokohe nga Gjykata për Krime të Rënda me 20 vite burg, nga 30 vite që kishte kërkuar Prokuroria për atentatin e dështuar me snajper në burgun e Vaqarrit në vitin 2016.
Shënjestra ishte Gazmir Daci, i cili ndodhej në ambientet e brendshme të Burgut të Vaqarrit, por ishte planifikuar që të vritej gjithsesi. Gazmir Daci ishte duke dalë në ambientet e jashtme të burgut, kur është qëlluar me snajper nga një kodër aty pranë. Plumbi i nxjerrë nga snajperi nuk e ka kapur shënjestrën, por një tjetër të dënuar.
Atentatori ishte vendosur në një distancë të largët në ambientet e jashtme të burgut dhe priti derisa Gazmir Daci doli në ajrim për ta qëlluar me snajper. Emri i parë ku u dyshua ishte Kolaveri, pasi Gazmir Daci ka vrarë Gazmir Kolaverin dhe kishte plagosur Robert Kolaverin, të dy vëllezër të Ergys Kolaverit.
Hasmëria e familjeve Kolaveri- Daci zë fill në vitin 2015 kur Gazmir Daci vrau vëllain e tij Valmir Kolaverin më 4 tetor 2015 dhe la të paralizuar vëllain tjetër Robert Kolaverin.
Vëllezërit Kolaveri kishin rrahur në bodrumin e një banese në Francë, Elson Dacin, vëllain e Gazmirit pasi ky i fundit po u prishte pazaret e transportimit të klandestinëve dhe po u merrte klientët. Me kthimin në Shqipëri, Gazmir Daci u kishte kërkuar llogari në një lokal, por sherri përfundoi me vrasje dhe plagosje.
Gazmir Daci u dënua me 35 vite burg për vrasje dhe plagosje, por vëllai i tretë Ergys Kolaveri nuk e la me kaq. Pikërisht me anë të një snajperi, Ergys Kolaveri tentoi të vrasë Gazmir Dacin pasditen e 30 korrikut të 2016 por doli ‘huq’ pasi plagosi kosovarin Lili Dulajn.
Kolaverit iu gjet në automjet vetëm disa dylbi por jo arma me të cilin tentoi të vrasë Gazmir Dacin. Në 2017 ai u dënua nga Gjykata e Krimeve të Rënda me 20 vite burg për tentativë vrasje. Por mesa duket, Apeli ka vendosur pas shqyrtimit të provave se i riu nuk ka pasur lidhje me atentatin brenda burgut duke i dhënë lirinë.
