Pas disa ditësh tensione dhe paniku , situata në Mitrovicë është stabilizuar dhe barrikadat serbe janë tërhequr plotësisht. Lajmin e ka bërë të drejtori i Agjencisë së Kosovës për Inteligjencë, Petrit Ajeti, i cili ka raportuar gjendjen aktuale në komisionin parlamentar. Kryetarja e këtij komisioni, Ganimete Musliu, ka deklaruar se informacionet e orëve të fundit flasin për një situatë që nuk ka më vend për t’u shqetësuar.
“Duke pasur parasysh rrethanat në veri për reciprocitet ne si komision e kemi ftuar drejtorin dhe ai i ka përgjigjur ftesës pozitivisht dhe ka raportuar. Për momentin është se gjendja e sigurisë është stabile në veri dhe organet kompetente janë gjendje gatishmërie që siguria e Kosovës të mos cenohet në asnjë mënyrë. I falënderoj qytetarët serbë për bashkëpunimin dhe i inkurajoj të vazhdojnë bashkëpunimin me shtetin e Kosovës dhe të mos bien pre e provokimeve nga Beogradi zyrtar”, ka thënë Musliu për EO.
Veriu i Kosovës u përfshi nga tensionet pasi qeveria e Kosovës paralajmëroi se duke nisur nga 1 gushti qytetarët serb që kanë makina me targa me akronime të qyteteve të Kosovës, që lëshohen nga Serbia, do të mund të ri-regjistrojnë makinat e tyre me targat RKS (Republika e Kosovës).
Po ashtu, nga sot u tha se të gjithë shtetasit e Serbisë, që do të hyjnë në territorin e Kosovës, do të pajisjen me një dokument të përkohshëm të hyrje-daljes, që do të zëvendësojnë dokumentet e identifikimit personal nga Serbia. Praktikë të njëjtë Serbia aplikon për shtetasit e Kosovës prej 11 vjetësh. Pas tensioneve dhe kërkesës së SHBA, Kurti vendosi shtyrjen me një muaj të këtij vendimi.
