Kreu i PD-së, Sali Berisha iu bashkua protestës së qytetarëve para Ministrisë së Brendshme, ku qytetarët po kërkojnë drejtësi për vrasjen e vogëlushes Jonada Avdi, nga polici Arjan Tase.
Kreu i PD-së, shoqërohet në protestë nga deputetët demokratë, Flamur Noka, Belind Këlliçi dhe Genc Strazimiri.
“Sot jam si kryetar. Ka një vendim të PD, që qytetarët nuk do jenë kurrë në protestë pa mbështetjen tonë. Ka tronditur mbarë Shqipërinë, dhe jo qeveritarët. Vogëlushja u vra nga një skaf i qeverisë.”-tha Berisha.
Protesta “ Nuk e vrau varka, por shteti” është organizuar nga shoqëria civile pas vrasjes së vogëlushes Jonada Avdia nga polici Arjon Tase, i cili po drejtonte një mjet lundrues tip skaf në bregdetin e Potasit.
Vogëlushja po kalonte pushimet së bashku me familjen në Himarë në momentin e tragjedisë kur u godit për vdekje nga skafi “vrasës” i drejtuar nga polici Tase.
Protestuesit kërkojnë dorëheqjen e ministrit të Brendshëm, Bledi Çuçi, ministres së Turizmit, Mirela Kumbaro dhe kryepolicit, Gledis Nano.
