Asistenca teknike, biznes milionash me paratë publike
Analiza e tenderave publike të vitit të fundit nxjerr në pah një situatë të rëndë të përdorimit të fondeve buxhetore. Në raportit e Agjensisë së Prokurimit Publik për Kuvendin dalin në dritë shifra pesimiste si për punën e administratës ashtu edhe për ndikmin e prokurimeve publike në ekonomi. Kështu rezulton që vlera mesatare e shpenzuar në një tender publik vitin që shkoi të ketë qenë 19 milionë lekë. Mungojnë projektet e mëdha të investimeve. Fondet e buxhetit, që për vitin e kaluar kanë qenë 90.7 miliardë lekë, janë copëzuar në qindra projekte të vegjël. Janë zhvilluar mbi 4500 procedura tenderimi. Ajo që bie në sy është se një pjesë e madhe e tyre janë kryer me negocim të drejtpërdrejtë, pra duke shmangur garën. Sipas shifrave të AKP, janë 4,630 procedura të shpallura për t’u zhvilluar me prokurim elektronik, dhe 2,706 procedura janë kryer me negocim pa shpallje paraprake. Me një përllogaritje të thjeshtë rezulton se mbi 56 për qind e procedurave të prokurimeve janë kryer jashtë garës.
Në raportin e AKP ka edhe një tjetër të dhënë interesante. Shumat e mëdha që përdoren për asistencë teknike. Një biznes në lulëzim që për 2015 ka marrë 19 milionë dollarë nga paratë publike. Një vit më parë, me 2014 fondi I shpenzuar në këtë drejtim ka qenë 11 milion dollarë.
