Të shtënat me armë në zonën e Napolit lanë të terrorizuar qytetarët që ishin të pranishëm. Mediat e huaja raportojnë se të shtënat erdhën nga një skuter me shpejtësi, në Piazza Trieste e Trento natën mes së shtunës dhe të dielës. Francesco Borreli, këshilltari rajonal i Europa Verde deklaroi se krimi është përhapur në të gjithë zonën.
“Ka një klimë të luftës urbane, është një përshkallëzim i krimit pa kufizime. Momente terrori, jashtë një lokali, me të gjithë klientët, përfshirë gra dhe fëmijë, duke ikur sapo dëgjojnë të shtënat. Një rrëmujë e përgjithshme, siç tregohet nga videot shokuese që na dërguan. Diçka e paprecedentë, dy hapa larg nga pallati mbretëror dhe Piazza Plebiscito. Imazhe që dëshmojnë për një klimë guerile urbane, me krimin që jeton dhe vepron me shpejtësi të plotë”, tha ai.
Momenti kur autorët qëllojnë me armë është filmuar nga kamerat e sigurisë së lokalit dhe priten që të bëhen publike në ditët në vijim.
