Deputetja demokrate Ina Zhupa tha sot gjatë një konference për mediat nga selia e Kuvendit (20 maj) se ligji i votuar nga mazhoranca socialiste që lejon ndërtimet në zonat e mbrojtura, sikurse ishte rasti skandaloz i Butrintit, është antikushtetues dhe duhet rrëzuar.
Për këtë shkak ajo deklaroi se kishte dorëzuar një projektligj të ri me qëllim që të rrëzohej i pari dhe të zbatohej rekomandimi i Komisionit të Jashtëm të Parlamentit Evropian, që gjithashtu i ndalon ndërtimet në zonat e mbrojtura të një vendi.
“Kam depozituar projektligj për shfuqizimi i menjëhershëm i Ligjit nr. 21/2024 dhe rikthimi i standardeve të mbrojtjes së zonave të mbrojtura në përputhje me Kushtetutën e Republikës së Shqipërisë, Marrëveshjen e Stabilizim-Asociimit, konventat ndërkombëtare dhe standardet europiane për mbrojtjen e mjedisit dhe trashëgimisë natyrore si dhe zbatimin e kërkesës së Komisionit të Jashtëm të Parlamentit Europian”, tha deputetja.
Zhupa e cilësoi një ndërhyrje problematike atë të qeverisë dhe mazhorancës, në dëm të mjedisit dhe trashëgimisë natyrore.
“Ligji 21/2024 “Për Zonat e Mbrojtura” përbën një nga ndërhyrjet më problematike ligjore ndaj mbrojtjes së mjedisit, trashëgimisë natyrore dhe interesit publik në Republikën e Shqipërisë. Ky ligj ka cenuar rëndë parimet kushtetuese të mbrojtjes së mjedisit dhe ka hapur rrugën për zhvillime intensive ndërtimore e turistike brenda zonave të mbrojtura, duke dobësuar mekanizmat e kontrollit dhe mbikëqyrjes mjedisore”, vijoi ajo.
