Nga Ilir Seci
Nikita Hrushovi shprehimisht e pranoi në vitin 1957: “Unë mendoj se politikat kulturore të Stalinit, sidomos politikat kulturore të vendosura në Leningrad përmes Zhdanovit, ishin mizore dhe të pakuptimta. Ju nuk mund të rregulloni zhvillimin e letërsisë, artit dhe kulturës me shkop, ose duke këlthitur urdhëra. Ju nuk mund të parashtroni një hulli dhe pastaj të shtrëngoni të gjithë artistët tanë që ta ndjekin atë, duke u siguruar se nuk do të devijojnë nga vija e drejtë dhe e ngushtë e saj. Në qoftë se ju do përpiqeni që të kontrolloni artistët tuaj duke i shtrënguar ata sa më shumë, atëhere nuk do të ketë rrahje të mendimeve, për pasojë nuk do ketë kritika dhe pa kritika nuk do të ketë të vërtetë. Do të kishte vetëm një stereotipi të zymtë, të mërzitshme dhe të padobishme.”
Pikërisht mbas këtij fjalimi të Hrushovit, Cerberi Sovjetik, promovuesi i Zhdanovizmit, (Zhdanovshchina), Aleksander Fadeyev vrau veten. Jo më kot këtë qëndrim të Hrushovit, Enver Hoxha e quajti “Revizionizëm”. Laviri vazhdoi e ruajti linjën staliniste, pse nuk kishte ndërmend të lëshonte pe përballë Revizionizmit Sovjetik. Pikërisht, për të përforcuar vijën, (hullinë) e Partisë në Letërsi dhe Arte Enveri solli Dritëro Agollin në krye të Lidhjes së Shkrimtarëve dhe Artistëve të RPSSH-së si njeriu më i besuar i Partisë!
Le t’u bien sa të duan qemaneve ata që u mallëngjyen këto ditë për Dritëronë! “Na ka ndihmuar për të marrë shkollat ne Dritëroi!”, shkruan njeri. “Mua më dha shkollën, edhe pse isha i prekur në kohën e diktaturës!”, hidhet tjetri…
Po mirë me u thanë këtyre: “Kush ua ndaloi shkollat në atë kohë juve!?”. Meqë një pjesë e madhe e këtyre mirënjohësve vijnë nga rradhët e fshatarësisë kooperativiste, po ua bëjmë një paranteze: “Me thanë ju – “Na dha shkollën Driteroi!” – është njisoj si të ngriheshin fshatarësia kooperativiste dhe të thonin në vitin 1991 : -“Partia na dha bagëtinë!”…Bagëtinë që ua pati kolektivizuar forcërisht pa i pyetur fare!…
Viti 2017 dhe shqiptarët ende vlerësojnë korifenjtë e Soc-Realizmit, ende vlerësojnë përçuesit e stalinizmit në letërsi dhe arte. Viti 2017 dhe shqiptarët ende nuk kanë evoluar as deri te qëndrimi revizionist i Nikita Hrushovit në vitin 1957…
