Nga Nebih Bushaj
Ajo që u shndërrua në protestën më të bukur që ky vend ka parë prej tre dekadash, përveç faktit që nuk ka drejtues e nuk pranon negociata, solli një tjetër risi: protesten për të gjithë. Një protestë prej së cilës fitonte një apo dy palë kishim parë më parë, por një protestë prej së cilës mund të përfitojnë të gjithë s’kishim parë deri me sot.
Po si po përfitojnë të gjithë dhe kush janë këta që po përfitojne?
Po ja, t’ja nisim me më banalen, studentët përtacë e të ‘dobët’ po përftojnë nga rasti e po bëjnë ca pushime më shumë në prag të fundvitit meqë u ra bingo-ja. Pastaj ka nga ata që për njëmijë arsye kanë mbetur pas me mësimet. Ky ishte shansi i tyre për të kapur ritmin. I lumtë atij që diti!
Dhe tek kalojmë nga përtacët e të ‘dobëtit’ tek punëtorët e të mirët, ndryshojnë edhe përfitimet. Shumica e këtyre nuk kanë pushuar asnjë ditë, pasi kanë qënë të angazhuar me protestën, pa dashur të them që përtacët e ‘të dobëtit’ s’janë angazhuar fare, por pritshmëritë janë të tilla që sa më student i rregullt aq më i angazhuar edhe në protestë. Sidoqoftë. Të gjithë studentët i hoqën vetes një barrë të madhe, gjobën e VKM-së, e cila i fuste duart direkt në xhepat e tyre.
A do kenë përfitime tjera studentët? Shpresoj që po, pasi arsimi në vendin tonë ka nevojë URGJENTE për përmirësim në të gjitha drejtimet! Grupe të caktuara si studentet FAU përfituan diçka më shumë se të tjerët me shkarkimin e pedagogut famëkeq Nasho, i cili nuk do t’ua nxijë më jetën. Përfitim mjaft i madh do thoja. E ku i dihet, mbase edhe ata të FSHN(e tjerë fakultetete që nuk po me vinë në mend tani) me këtë rast mund të bëjnë ndonjë gjë më famëkeqët e tyre që t’u lirohet litari ne fyt.
Me ç’kemi parë kjo protestë solli të mira edhe për tjerët. Njerëzve iu ritkthye shpresa e humbur se diçka e mirë mund të bëhet në këtë vend. Shpresa që paska mjaftuar t’ja gërvishtësh pak dheun e hedhur sipër për të shpërthyer si lulet në pranverë.
Prindërit anembanë janë të ekzaltuar për guximin e bijve të tyre e presin edhe më shumë se ato tetë kërkesa.
Njerëzit e vranë frikën me këtë rast. Infermierët kanë paralajmëruar qeverinë se do ketë protesta në rast të mosplotësimit të kërkesave të tyre deri më datë 20 Dhjetor.
Një grup tjetër sot marshoi drejt kryeministrisë në shenjë proteste për çmimet e karburanteve, diçka e importuar por e vonuar do thoja. Por numri i përfituesve nga kjo protestë nuk ndalet me kaq.
Këta të mëposhtmit janë edhe më interesantët. Janë ata që kanë tentuar të dalin në krye si drejtues të saj e kur s’u ka ecur si koordinatorë. Ca tipa po e përdorin se vuajnë për vëmendje ndërsa të për t’u reklamuar në tregun e politikës. A ka rast më të volitshëm? Besoj që jo. Nuk do të habitesha fare nesër po të shikoja fytyra nga këta tipat nëpër forumet rinore të partive. Vetë partitë në fakt duan të rinovojnë imazhin e tyre dëmtuar rëndë ndër vite si shkak i pazareve që bëjnë në kurriz të popullit. Ka nga ata që kanë tentuar të marrin frerët për llogari të partive, kush për llogari të pushtetit me synimin për ta përçarë e për t’i hequr qeverisë një halë nga sytë e kush për llogari të opozitarëve të cilët më së paku deri nesër kanë për t’i përdorur këto fytyra për të mbledhur vota, si ata që drejtuan protestën e studentëve e më së shumti dëshirojnë ta konvergjojnë ne kërkesat e tyre politike.
Qeveria përfitoi mirë nga rasti për të na dhënë një shfaqje të stisur që për fatin e saj të keq e për fat të mirë të studentëve i doli nga duart. tentoi ta përdorte për të larguar vëmendjen prej skandaleve që s’kanë të sosur duke e kthyer komunikimin e KM me studentët në një lloj zënke të dashuruarish, ku ai po luan të dashurin që medoemos dëshiron të pajtohet dhe fton ‘të dashurën e tij’(studentët) të pajtohen me story te tipit “kur do flasim”, “mos ta humbim kohën kot”. Kështu protesta me e bukur e tranzicionit u shndërrua në lopën që shumë e mjelën, shumë tentuan ta mjelin e kush e di sa kanë për ta mjelur deri në fund.
