Deputeti i Partisë Demokratike Gazment Bardhi ka dhënë detajë në lidhje me takimin që zhvilloi sot me kryetarin e Këshillit Kombëtar të PD-së, Edi Paloka. I ftuar në “Open”, Bardhi thotë se me Palokën kanë folur mbi disa versione apo mënyra se si ne mund të dalin me një kandidat të përbashkët. I pyetur në lidhje me udhëzimin e primareve që miratoi Berisha, Bardhi thotë se ka problematika me këtë proces. Referuar ngërçit në PD, Bardhi ngriti pyetjen se kë kryetar seksionesh do të votonin simpatizantët, ata që njeh Berisha apo grupi tjetër i selisë blu. Bardhi tha se primaret janë diskutuar me Palokën, por është rënë dakort të mos zbulojnë detaje në media.
“Unë nuk dua që ta quaj një akt të njëanshëm atë që ndodhi sot. Me zotin Paloka kemi folur mbi disa versione apo mënyra se si ne mund të dalim me një kandidat të përbashkët. Në parim, askush nuk ka asgjë kundër votës në Partinë Demokratike. Por, duhet bërë një analizë e thellë. Zoti Berisha ka mbajtur qëndrimin e pjesës që drejton. Nëse ne qëndrojmë të ngurtë, që secila palë vazhdon me të njëjtën sjellje, e sigurtë është që i fituari i madh është Edi Rama. Ne ramë dakort që të mos nxjerrim detaje nga biseda në media, unë perceptova dhe besoj se unë dhe zoti Paloka, në ato bisedime ishim të hapur dhe të sinqertë për të dalë me kandidatë të përbashkët. Kemi shtruar opsione të ndryshme, përfshirë dhe primaret, që nuk është një proces kaq i pastër saç tingëllon nga televizori. Fjala vjen, unë sapo dëgjova simpatizantët që do të votojnë. Ne tani kemi një problem? Kë do votojnë? Kush janë kryetarët e seksioneve? Ata që njohim ne apo ata që njeh zoti Berisha? Kjo është pastaj të bëjmë teatër, sikur nuk kemi asnjë problem në parti,”- tha Bardhi ndër të tjera.
