Lidhur me takimin e Alibeajt me Ballën të mbajtur ditën e sotme sa i takon bisedimeve për propozimin e një emri për postin e presidentit të republikës, ka reaguar deputeti i Partisë Demokratike, Luçiano Boçi. Sipas Boçit, Alibeaj se thjesht po përmbushte misionin për përçarjen e PD-së dhe se po merrte pjesë në bisedime për vetëm për të përfaqësuar interesat e tij personale.
“Formula” për zgjedhjen e Presidentit na paska ngecur e ngatërruar në dilemën Balla Alibeajn apo Alibeaj Ballën. Do e shpallin nesër e në vazhdim të dy “me transparencë” në sofrën “publike” të interesave. Merre me mend si ka degraduar çështja e zgjedhjes së kreut të shtetit!? Jashtë negociatave politike, siç e kushtëzon kushtetuta dhe brenda konsideratave të individëve politikë me prioritete krejt të ndryshme, por që asnjëri nuk e ka shqetësimin për Presidentin. Për ata, në fund të fundit, me kompetencat që e kanë katandisur, ai nuk ka pikë rëndësie. I pari në formulë (mendoni kë të doni si të parë) ka interes të sulmojë opozitën duke pastruar Ramën. I dyti (gjithmonë sipas zgjedhjes suaj) kërkon përçarjen e opozitës duke favorizuar Ramën. Askush nuk mund ta dallojë ku fillon njëri e ku mbaron tjetri. Dhe në fund kjo formulë pritet të pjellë Presidentin. Domethënë janë bashkë dhe e vetmja gjë që i ndan është se Balla ka mandatimin e Asamblesë e Grupit Parlamentar të PS, ndërsa Alibeaj ka mandatimin e Ramës dhe Ballës. Përsëri diferenca nuk është aq e madhe! Pothuaj sa emri që ka në xhep Rama për President!” – shkruan Boçi në Facebook.
