Ish-presidenti dhe kreu aktual i Partisë së Lirisë, Ilir Meta njofton se do të zhvillojë një takim me strukturat e forcës politike që drejton në qytetin bregdetar të Durrësit.
Përmes një postimi në Facebook, Meta shprehet se takimi do të realizohet në orën 19:00. Më tej, kreu i Partisë së Lirisë thekson se Durrësi është i etur për ndryshim, për një të ardhme më të mirë.
“Sot në orën 19:00, takimi i parë në Durrës me strukturat dhe përfaqësuesit lokalë të Partisë së Lirisë.
Durrësi mezi pret ndryshimin, për një të ardhme më të mirë, më shumë vëmendje dhe zhvillim!”-shkruan Meta.
Sjellim në vëmendje që një ditë më parë, Meta zhvilloi një takim me strukturat e Partisë së Lirisë në Tiranë. Nga kryeqyteti, Meta akuzoi kreun e qeverisë, Edi Ramën se ka betonizuar Tiranën ndërsa premtoi se do ta kthejë 20 vite më pas. “Kjo tirani do jetë nën këmbët tuaja dhe popullit të lirë të Tiranës. Tirana do jetë e para kundër tiranisë. Shqipëria ka pasur pushtues edhe të përgjegjshëm. Sigurisht që Tirana ka përjetuar si askush tjetër, pabesinë e këtij sekti makut por edhe antikombëtar që e nisi duke u përpjekur të vjedhë meritat e ish-kryeministrit Ilir Meta për t’i rikthyer Tiranës parqet e gjelbra, për të mbrojtur atë trashëgimi kulturore që kishte Tirana nga e kaluara përfshirë dhe Teatrin Kombëtar.
Për ta kthyer në Tiranën e betonit, ku nuk dallohet kulla e Sahatit për shkak se kulla të tjera qiellgërvishtëse kanë mbushur Tiranën. Tirana ka hak për të marrë, do e marrë shumë shpejt për ta kthyer pabesinë me drejtësi për t’i dhënë fund këtij degradimi. Dua t’u kthej disa vite pas kur isha kryeministër, ku mora disa vendime për t’i rikthyer Tiranës Parkun Rinia, kur ky vinte nga pas më vinte si xhol. Pastaj, krijoi legjendën sikur kishte prishur Parkun Rinia.”-tha Meta dje.
