Tahiri thyen heshtjen. Prej më tepër se një viti i akuzuar për përfshirjen e tij në trafikun e drogës me grupin e Habilajve, ish-ministri Saimir Tahiri doli sot para mediave me një deklaratë.
Tahiri tha se duhet të thotë një të vërtetë që nuk mund ta fshehë. Sipas tij u bënë bashkë bilbila dhe kopila për të fshehur të vërtetën.
Tahiri tha para gazetarëve se ai ka në dorë dokumentet që provojnë pafajësinë e tij nga Gjykata e Katanias, e cila ka mbyllur hetimet ndaj tij.
Deklarata e Tahirit:
Të kisha zgjedhur që të bëja politikanin nuk do kisha lënë rrënjë e dhëmballë për t’iu përgjigjur atyre që kanë folur për mua, për t’iu përgjigjur të gjithë politikanëve që janë marrë me mua dhe analistëve. Po unë nuk zgjodha që të bëja politikanin. Ka politikanë që kanë vrarë, kanë vjedhur dhe nuk janë hetuar kurrë, janë marrë me media dhe prokurorë, derisa kanë dalë pa lagur.
Unë kam pritur pa dashur që të ndikoj te hetimet, kam heshtur për gjysmë-letrat e prokurorisë, për analistët që studio më studio merreshin me emrin tim. Unë vetëm mund të qeshja me ata njerëz që më njihnin mirë dhe bënin sikur nuk më njihnin, dhe me ata që s’më kishin njohur kurrë dhe bënin sikur e dinin mirë se kush isha. Unë kam pritur vetëm betejën time.
Me besimin që nuk e kam humbur kurrë, nuk e kam pasur të lehtë që të hesht, por boll… Unë kam diçka me rëndësi që duhet ta ndaj me publikun, pasi e vërteta nuk duhet fshehur. Ju kujtohet si në 24 Tetor 2017 ju tregova letrën që nuk kishte hetim ndaj meje, dora e zezë që lëviz nga poshtë mediat dhe oligarkët thanë se letra që unë paraqita ishte e fabrikuar.
Në vendimin e gjykatës së Katanias thuhet që pushohen hetimet për Saimir Tahirin. Çuditërisht, dora e zezë arriti që të shpërndante këtë vendim që prej ditës së parë kur unë thashë që do ta bëja publike. Unë nuk bëra politikë, nuk u fsheha. Jam i vetmi politikan që vetëm se pse përmendem në disa biseda të trafikantëve kam kërkuar dy herë hetim ndaj personit tim. Autoritetet italiane me vendim të formës së prerë kanë ndërprerë hetimet.
Tani dalin e thonë se Rama po mbyll hetimet për mua. Nuk e dinë se drejtësia e blerë për mua është më keq se çdo dënim. Unë nuk e kam të largët natën, kur Saliu dhe Luli i shkuan për darkë në shtëpi Ilir Metës. Pasi lanë duart me drejtësinë, tallnin edhe gurabijen me popullin duke thënë sa mirë gatuante Monika.
https://www.facebook.com/faxweb.al/videos/182495699343560/
