Ministri i Brendshëm përsërit akuzat për gjyqtarin që pezulloi drejtorin e Policisë së Shtetit, akuzon edhe KLD-në
Ministri i Brendshëm, Saimir Tahiri, doli para mediave për të përsëritur akuzat për gjyqtarin, Arjan Aliaj, i cili vendosi pezullimin e drejtorit të përgjithshm të Policisë së Shtetit, Haki Çako. Tahiri ka deklaruar sërish se ky gjyqtar nuk ishte ai që duhet të shqyrtonte çështjen, dhe se ka liruar vrasës e përdhunues. Ndërsa, është ndalur më gjatë te deklarata më e fundit e mbërritur kundër sulmeve që ministri i bëri gjyqtarit, atë të KLD. Tahiri ka deklaruar se KLD ka bërë sot deklaratën më të sinqertë, ku iu tregoi shqiptarëve fytyrën e vërtetë të drejtësisë, duke mbrojtur përdhunuesin.
“I bëj thirrje çdo punonjësi policie të bëjnë punën e tyre me kurajo, duke mos u stepur aspak nga ato që janë trimëruar sot. Do ta bëjmë Shqipërinë më të sigurt dhe më të drejtë. Sot çdo polic është krenar për punën e bërë, duke i shërbyer vendit në mënyrën më të sigurt e më të drejtë. Dua të përshëndes deklaratën e KLD, që doli në mbrojtje të gjyqtarit. Është një ndër deklaratat më të sinqerta të KLD, që u demaskua në mënyrë kaq ekzemplare për të mbështetur përdhunues. KLD u dha mundësi dhe njëherë shqiptarëve për të treguar fytyrën e vërtetë të drejtësisë, dhe nevojën për reformën. Dua të bëj me dije faktet skandaloze që dëshmojnë se si funksionon sistemi i drejtësisë në vend. Aliaj nuk ishte gjyqtari që duhet të merrte në dorë çështjen. Kjo çështë duhet të shqyrtohej nga gjyqtari Adriatik Boçaj”, tha Tahiri.
