Kriza ekonomike në vend dhe rritja e çmimeve vijon të jetë e njëjtë. Deputetja e PD Jorida Tabaku paralajmëron sërish për këtë çështje duke përfshirë edhe inflacionin.
Gjatë fjalës së saj në lidhje me raportin që Banka e Shqipërisë po bën në Komisionin e Ekonomisë dhe Financave, anëtarja e Komisionit të Ekonomisë u shpreh me shqetësim në lidhje me presionet inflacioniste në vendin tonë.
“Inflacioni dhe goditja e tij u bënë më të forta me nisjen e luftës në Ukrainë dhe kjo shoqëruar me defektet në zinxhirin e furnizimit ka prodhuar një inflacioni që llogaritet në 6.3% për Prillin 2022 (nga viti në vit). Megjithëse kemi presione të tilla inflacioniste Banka e Shqipërisë është treguar korrekte në masat e marra ndonëse këto presione duke pasur parasysh rrogat e ulëta dhe varfërinë e lartë do të krijojnë presione edhe më të mëdha për qytetarët”, u shpreh ajo.
Tabaku tha se sipas përllogaritjeve rezulton se normë e inflacionit vetëm tek familjet e varfra është e rritur me 1% në mënyrë të drejtë për drejtë duke ndikuar në zvogëlimin e atyre pak të ardhurave në xhepat e familjeve shqiptare që jetojnë poshtë minimumit jetik prej 5 USD/ditë.
“Tanimë atyre do t’u duhen më shumë se sa 5 USD/ditë për të mbijetuar.
“BSH duhet të ketë një mendim në lidhje me situatën e borxhit sidomos në këto momente të presionit inflacionist”, shprehet Tabaku.
Deputetja e PD u shpreh në leximin e relacionit të saj në lidhje me raportin e Bankës së Shqipërisë se institucionet kryesore ndërkombëtare si FMN dhe BB kanë shprehur shqetësim në lidhje me borxhin publik dhe gjithashtu rritjen e shpenzimeve për PPP.
“Situata është problematike që vijnë nga Borxhi Publik, – vijoi ajo,- nëse këtu do të përllogarisim të dhënat e PPP-ve, pra borxhit të fshehur, atëherë do të kemi të bëjmë me një Borxh Publik real në kufijtë e 100% të PBB”.
“Situata rëndohet edhe më shumë nëse do të kemi parasysh që normat e interesit do të rriten dhe për rrjedhojë ne do të paguajmë më shumë interes mbi principalin që kemi marrë për Eurobondet tona”.
Tabaku deklaroi se me gjithë paralajmërimet e vazhdueshme të FMN në lidhje me shpenzimet e qeverisë dhe borxhin e marrë prej saj, ku veçojmë këshillën e vazhdueshme të FMN në heqjen dorë nga projektet me risk të lartë si PPP që janë një borxh i fshehur; qeveria ka vazhduar ta trajtojë këtë temë jo me konservatorizmin e duhur financiar.
“Fatkeqësisht edhe Banka e Shqipërisë nuk ka qenë e përfshirë siç edhe pritej nga një institucion i pavarur në lidhje me borxhin publik dhe mbi të gjitha faktorët makroekonomikë”, përfundoi Tabaku ndërsa dha një këndvështrim tejet kritik ndaj reagimeve të BSH për situatën makroekonomike në vend.
“E njëjta situatë u vërejt edhe gjatë pandemisë dhe ndihmës ekonomike të qeverisë shqiptare ku fondi për pandeminë COVID-19 të bazuar nga garancia sovrane u kalua thuajse tërësisht vetëm në kompanitë që kanë përfituar nga PPP-të dhe kontratat e tyre. Kjo situatë ka prodhuar më pak të ardhura për konsumatorët dhe sipërmarrjet nga ana tjetër presionet inflacionistë që kanë nisur të ndjehen në ekonominë tonë që në fillimet e verës së vitit të shkuar si pasojë e zinxhirit të furnizimit nxitën një rritje frenetike çmimesh. Në këto kushte qeveria shqiptare vendosi që të marrë një kredi të madhe në formën e EUROBOND”, shprehet ajo.
