Turqia është tronditur nga një sulm terrorist ku me anë të një pajisjeje shpërthyese të telekomanduar është sulmuar autobusi që transportonte rojet e burgut, duke vrarë një nga rojet, tha një zyrtar turk për mediat turke. Nga shpërthimi janë plagosur katër roje të tjera.
Sulmi ndodhi në rrethin Osmangazi, në provincën veriperëndimore të Bursës të Turqisë, teksa autobusi po transportonte rojet në një burg në rajon. Njëri prej të plagosurve ishte në gjendje të rëndë.
“Vlerësimi ynë është se një bombë e bërë me dorë që mbeti nën një shtyllë elektrike u shpërthye me telekomandë ndërsa automjeti i burgut po kalonte,” u tha gazetarëve guvernatori i Bursës Yakup Canbolat pasi inspektoi vendin e ngjarjes.
Canbolat tha se në autobus ishin rreth 30 persona.
“Të gjithë ata u dërguan në spital si masë paraprake,”- tha ai. Nuk ka pasur përgjegjësi të menjëhershme për sulmin.
