Që përpara ndeshjes Partizani – Tirana, pjesa më e madhe e specialistëve parashikuan vështirësi në shënimin e golave nga të dy skuadrat dhe më pas fajësuan skemat taktike të të dy skuadrave, duke i cilësuar Sormanin dhe Dajën, si trajnerë që stimulojnë lojën mbrojtëse. Në fakt, kjo shterpësi e dy skuadrave më të titulluar në vend ka emra të përveçëm. Partizanit i mungon Sukaj, goleadori i sezonit të shkuar, ndërsa Tiranës 15 golat dhe fantazia e Bakajt. Tek Partizani i kanë besuar Ekuban, një lojtar interesant, por që ka mangësi në goditjen e fundit, ndërsa sulmuesi shkodran që mund t’i ribashkohet të kuqve në janar ka të paktën 20 gola të garantuar në sezon.
Nga ana tjetër, tek bardheblutë, të tre afrimet e merkatos së verës, Edek, Moses dhe Merville, nuk e bëjnë dot një Bakaj. Kjo është edhe arsyeja, se përse Skënderbeu është sërish në avantazh për një titull të shtatë, pasi Salihi është sërish aty, i ndihmuar nga Serxhio Zhunior, ose Xhejms edhe këta të provuar tashmë. Por edhe Kukësi nuk qëndron pas, me Pero Pejiç në vijën e parë, Eminin pas shpinës së tij dhe si alternativë është edhe një i ri shumë i talentuar si Sindrit Guri.
