Studenti shqiptar Benjamin Gecaj është futur në listën e personave që punojnë për platformën sociale “Instagram”, falë një marrëveshjeje të arritur mes palëve.
Bashkëpunimi ka ardhur pasi Gecaj ka arritur që për disa muaj të gjejë mangësi në sistemin e Instagram. Fillimisht është shpërblyer me 25 mijë dollarë, por kompania ka kërkuar që studenti në fjalë të jetë pjesë e stafit të kompanisë.
Gecaj është nga fshati Llaushë i Komunës së Skënderajt, si dhe ndjek studimet në vitin e parë në Fakultetin e Shkencave Kompjuterike në “University for Business and Technology”, Prishtinë. Shkathtësitë dhe atributet e tjera ai thotë t’i ketë arritur falë këtij institucioni të arsimit të lartë.
“Ofertën e kam pranuar me kushtet që më kanë ofruar, tani do të filloj në intership me pagesë, dhe në muajt në vazhdim do të punoj në mënyrë të rregullt. Kam për detyrë të bëj analiza e raporte të ndryshme në vendet e Europës, konkretisht në pjesën e Ballkanit, dhe për mua është një arritje shumë e madhe”- ka theksuar Gecaj.
