Një grup studentësh iu bashkuan nismës së Bashkisë së Tiranës për projektin e mbjelljes së 2 milionë pemëve të Pyllit Orbital.
Kreu i Bashkisë së Tiranës, Erion Veliaj, dhe grupi i studentëve nga “Qyteti Studenti”, mbollën 110 pemë të reja të dhuruara nga biznesi, për të vijuar pyllëzimin e qytetit.
Veliaj shtoi se nisma të tilla janë pozitive për të ndërgjegjësuar të rinjtë për rëndësinë e krijimit të sipërfaqeve të gjelbra dhe për kujdesin ndaj mjedisit.
Kryebashkiaku theksoi se falë nismave të ndryshme të ndërmarra gjatë këtyre dy viteve nga Bashkia e Tiranës, ajri në kryeqytet është tre herë më i pastër se ai i Shkupit.
Ai deklaroi se mbjellja e pemëve të reja është investimi më i mirë për brezat e ardhshëm.
