Fieri është qyteti i parë që i është përgjigjur thirrjes nga Partia Demokratike e cila ka lajmëruar pasditen e sotme protestë paqësore nën moton “Stop vrasjes në komisariate”, pas vdekjes së të riut Ilvi Meta në Kavajë.
Protesta pritet të zhvillohet në orën 20:00 në të gjitha komisariatet e policisë në të gjithë vendin dhe në godinën e Kryeministrisë do të ndizen qirinj.
“Ne orën 20.00 pranë të gjitha komisariateve të policisë në të gjithë vendin do të ndizen qirinj në një protestë të heshtur paqësore nën moton “Stop vrasjes në komisariate”. Në Tiranë qirinjtë do të ndizen tek Kryeministria, po në orën 20.00. Ftojmë mediat në Tiranë dhe në rrethe të ndjekin këtë protestë të heshtur”.
Kujtojmë se, 31-vjeçari Ilvi Meta i dha fund jetës 3 ditë më parë, në datën 4 maj ndërsa ndodhej në ambientet e Komisariatit të Policisë së Kavajës duke u vetëvarur. Lidhur me këtë ngjarje të rëndë është ngritur një grup hetimor.
Ndërkohë babai i viktimës, Agim Meta, në një komunikim, deklaroi se nuk besonte tek versioni i policisë, pasi djali i tij nuk kishte probleme. Sipas Agim Metës, djali i tij 31-vjeçar njihej nga të gjithë si një djalë i qetë dhe pa probleme.
