Stina e verës është problematike për personat që vuajnë nga sëmundje të shëndetit mendor.
Ekspertët e Institutit të Shëndetit Publik thonë se i nxehti i verës sjell çrregullim të neurotransmetuesve që stimulojnë rëndim të gjendjes fizike dhe psikologjike të pacientëve. Kujdes të veçantë duhet të bëjnë personat që shfaqin shenja të stresit, ankthit e depresionit.
Temperaturat e larta të stinës së verës ndikojnë në përkeqesimin e shëndetit për pacientët e sëmundjeve mendore. Përgjegjësja e sektorit të sëmundjeve mendore në ISHP, Jonida Haxhiu, e argumenton këtë me çrregullimin e niveleve të neurotransmetuesve që stimulojnë agravim të gjendjes fizike dhe psikologjike.
Jonida Haxhiu: Vapa ose temperaturat e larta shkaktojnë një përkeqësim të problemeve të shëndetit mendor. Statikisht është vërtetuar që të gjitha problemet e shëndetit mendor, të gjithë personat që janë të diagnostikuar me probleme të shëndetit mendor kanë një përkeqësim në motin e nxehtë. Ekziston ajo që quhet teoria e dopaminës, pra nga çrregullimet e niveleve të neurotransmetuesve mendohet që efekti fizik që ka kjo gjë, efekti fiziologjik ndikon në pasojat psikologjike.
Në këtë stinë përjetim të shtuar të stresit, rëndim të gjendjes që vuajnë nga ankthi dhe depresioni.
Jonida Haxhiu: Stresi, depresioni, psikoza, problemet me substancat. Është vënë re rritje e suicideve.
Familjarët duhet të kenë kujdes, në rast se vetë pacientët janë të pamundur, për të zgjedhur për ta vende të freskëta, dhe të shmangin konsumimin e pijeve që kanë sheqer të shtuar.
Jonida Haxhiu: Ambjente të freskëta, sa më shumë të ajrosura, konsumimi i pijeve në mënyrë që të freskohet trupi. Duke e përmendur këtu që sheqeri i shtuar apo pijet e gazuara nga ana tjetër përveç dëmeve fizike shkaktojnë dhe stres për organizimin, gjë që mund të reflektohet dhe tek këta persona me probleme të shëndetit mendor.
Shqipëria nuk ka studime të mirëfillta për numrin e pacientëve të prekur nga këto sëmundje, por referuar të dhënave në sistemin shëndetësor parësor për Tiranën në një vit kryhen mesatarisht 15.000 vizita, persona që kërkojnë ndihmën e mjekëve psikatër për shkak të çrregullimeve dhe probleme të shëndeti mendor.
