Produkte të certifikuara e me standarde, kjo është ajo që do të ofrojë thertorja publike e hapur nga Bashkia e Tiranës në zonën e Vaqarrit. Një projekt i cili përveçse do të disiplinojë situatën me konsumin e mishit në Tiranë, shmang ndotjen e mbi të gjitha do të ofrojë informacion për mishin e kontrolluar.
Kryebashkiaku Erion Veliaj, tha se me hapjen e thertores publike, për të cilën kujdeset Agjencia për Mbrojtjen e Konsumatorit, vendoset një standard i ri në garantimin e cilësisë dhe standardit ushqimor.
Veliaj deklaroi se ka ardhur koha që të gjithë të mendojnë seriozisht për sigurinë ushqimore.
Kryebashkiaku kërkoi prej operatorëve privatë që ushtrojnë veprimtarinë e tyre në fushën e tregtimit të mishit që të garantojnë të njëjtat standarde dhe kushte higjienike sikurse edhe thertorja publike e Bashkisë së Tiranës.
Veliaj u bëri thirrje qytetarëve që të bashkëpunojnë në këtë nismë të Bashkisë për ndërgjegjësimin dhe garantimin e standardeve më të larta për sigurinë ushqimore që të kërkojnë paraprakisht certifikatën e lëshuar nga veterineri.
