Gjatë seancës së sotme ku u diskutua për paketën Antishpifje, të hartuar nga qeveria, Elisa Spiropali kërcënoi gazetarin Ylli Rakipi, duke përdorur fakte të shtrembëruara.
Dy ditë më parë, në një intervistë për Ora News, Rakipi u shpreh se Spiropali ngjan me gruan e Gëbelsit, e cila me komandën e Hitlerit helmoi edhe fëmijët e saj, për të treguar devotshmërinë ndaj liderit. Në këtë deklaratë, nuk kishte asnjë referencë për fëmijët e Spiropalit, por vetëm për sjelljen e saj politike, për të cilën media dhe gazetarët kanë detyrimin të flasin pa censurë.
Në fjalën e saj, Spiropali ka kërcënuar gazetarin nga foltorja e Kuvendit, duke u shprehur se nëse nuk ekziston ligji, i bie që ajo dhe burri i saj ta rrahin gazetarin në rrugë.
“Dy mundësi ka, siç ishim në kohët e mëparshme, në rast se nuk ka gjykatë, nuk ka ligj, nuk ka kod nuk ka rregullator, atëherë njeriu i zgjidh vetë problemet. I bie që sa herë këta zotërinj të na fyejnë ne dhe qyetarët, qytetarët dhe ne të shkojmë dhe t’i rrahim këta në rrugë. Apo jo? I bie që ai kur të më përmendi mua, fëmijën e palindur akoma dhe helmimin, unë të shkoj, bashkë me bashkëshortin tim dhe ta rrahim në rrugë, apo jo? Por, ne nuk e rrahim dot në rrugë, se s’jemi si ata. I ka rrahur ai që është kampioni sot i fjalës së lirë, ai që ulej aty, i ka bërë të vdekur dhe akoma kanë frikë nga hija e tij, rrinë nëpër emisione drejt dhe sus, sepse i tremb hija e plumbave të atij. Këta po mbrojnë fjalën e lirë? Ka një aspekt qesharak, janë mbrojtësit e kësaj. Kur i shohin me parrulla, besoj e shohin se sa qesharake dhe e pavërtetë, është beteja e tyre. Nuk kanë asnjë fakt, nuk e kanë lexuar, fare“, u shpreh Spiropali.
